რაღაცნაირი ბლოგი

შესავლის სახით:

ცოტა ხნის წინ გამოცხადდა კონკურსი ბლოგერებისთვის, ნიჭიერისთვის რომ სჭირდებათ ბლოგერები. პირობითად ჯეოსტარის მიმოხილვა უნდა გაგვეკეთებინა, თუმცა შეგვეძლო რამე სხვა შოუთი შეგვეცვალა. ჯეოსტარისთვის არ მიყურებია, განსაკუთრებით ბოლოსთვის, ამიტომ გადავწყვიტე ფინალისთვის მაინც მეყურებინა წარმოდგენის შესაქმნელად. ნანახმა მოლოდინს გადააჭარბა!- კინაღამ საერთოდ გადავიფიქრე საკონკურსო პოსტის დაწერა ისე გამაღიზიანა.

დათრგუნულმა გავიხსენე სხვა შოუებიც- თქვეს, რომ აუცილებელი არ იყო ჯეოსტარი. ჯეო-რამეებს გადავხედე, მაგრამ არა..მერე ვიფიქრე ჩემს გამოგონილ შოუზე დავწერ მეთქი, მაგრამ გამოცდების გამო ძალიან ცოტა დრო მაქვს და გამოგონილ კი არა, არსებულზეც ძლივს მოვახერხე დაწერა და ისიც უმარილოდ.

ბევრი რომ არ გავაგრძელო, განსახილველ შოუდ გადავწყვიტე “ნიჭიერი”-ს  უცხოური ანალოგი ამეღო. ძალიან ბევრ ქვეყანაშია, მაგრამ არჩევანი ჩემს ფავორიტზე, ინგლისურ ანალოგზე შევაჩერე..

ბრიტანული ვერსიის პოსტერი

მაშ ასე, ყველასთვის კარგად ცნობილი ბრიტანული ვერსია.

ზოგადად, ტალანტ შოუს მიზანი ყველა ქვეყანაში, ტალანტების აღმოჩენაა. მონაწილეები გადიან კასტინგს. ფორმატის მიხედვით, გადაცემის ჩაწერას ესწრება ბევრი  ხალხი. კონკურსანტები გამოდიან სცენაზე და უნდა წარსდგნენ ჟიურის  და მაყურებლის წინაშე.  ჟიურის აქვს უფლება შეაწყვეტინოს მონაწილეს მოქმედება იმ შემთხვევაში, თუ არ მოეწონებათ, თუმცა სანამ სამივე ჟიურის წევრი არ დააჭერს ღილაკს, იქამდე შეუძლია განაგრძოს კონკურსანტმა თავისი საქმიანობა.

ჟიურის მაგიდა და ჟიურის გამყინავ ხმიანი ღილაკი:)

გადაცემას ჟიურის გარდა ყავს ორი წამყვანი, რომელიც კულისებშია, როგორც წესი მონაწილის გულშემატკივართან ერთად და ისინი ძირითადად ტელემაყურებლისთვის მუშაობენ.

უშუალოდ ბრიტანულ ვერსიაზე გადავიდეთ და წინასწარ გეტყვით, აქ კრიტიკას ვერ ნახავთ. ცალ-ცალკე ყველა ასპექტის განხილვას არ ვაპირებ, უბრალოდ რამდენიმე სიტყვით გეტყვით სამუშაო ჯგუფზე, რა თქმა უნდა ჟიურიზე განსაკუთრებით:

ძალიან მომწონს მათი სტილი.ლირიულ გადახვევას გავაკეთებ და გეტყვით, რომ დღეს ჯეოსტარის ფინალს რომ ვუყურე, კინაღამ გული გამისკდა ჟიურის მოქმედებაზე. თავი სადღაც ჭეშმარიტ ქართულ სუფრაზე მეგონა “ა შენ შემოგევლე, უ შენი ჭირიმე” ფრაზებით რომ ამკობდნენ  ფინალისტებს. საშინელებაა, როცა იმის მაგივრად, რომ პროფესიონალიზმი შეგიფასონ, გიფასებენ “შენ რა კაი ხარ და შენთან ერთად დალევა რა იქნება” (ზუსტი ციტირება)

ბრიტანული ვერსიის ჟიურის  ზოგადად ასეთი შოუების ჟიურის სტანდარტული “გარეგნობა” აქვს (თებზსაც ეწერა ფორუმზე ეს ფორმულირება)

• ერთი ჟიური მკაცრია, ყველას მიმართ კრიტიკული
• მეორე საშუალო, ზომიერი.
• მესამე  ლმობიერი

ინგლისურ ვერსიაში როლები ასეა გადანაწილებული:

Simon Cowell

მკაცრი Simon Cowell, რომელიც ძაალიან მიყვარს. პრინციპში ის როგორც წესი პირველი აჭერს ხოლმე მონაწილის “გამაჩერებელ” ღილაკს.პირდაპირ ამბობს ყველანაირ კრიტიკას და მოკლედ, მკაცრია.

Piers Morgan

პირსი ზომიერებას ემსახურება;

Amanda Holden

ამანდა კი ლმობიერის რანგშია. ის მგონი თითქმის ყოველთვის ბოლო აჩერებს კონკურსანტს. ხშირად უჩუყდება ხოლმე გული ..

და ორი წამყვანი, შეხმატკბილებული დუეტი: Ant & Dec

Ant & Dec

ბრიტანეთში ეს შოუ პირველად 2007 წლის ივნისში გავიდა ეთერში. გამარჯვებულს 100.000 ფუნტი სტერლინგი გადაეცა და უფლება მიეცა დედოფლის წინაშე ემღერა კონცერტზე.  გამარჯვებული იყო paul potts-ი, ოპერის მომღერალი.

მეორე ნაწილში გაიმარჯვა George Sampson-მა, breakdance-ს მოცეკვავემ.

2009 წლის აპრილში დაიწყო მესამე ნაწილი და პირველივე ეპიზოდში სენსაციურად გამოჩნდა ყველასთვის ცნობილი Susan Boyle სიმღერით “I Dreamed a Dream”. არ მინდა ვიდეოებით გადავტვირთო პოსტი, ლინკზე შეგიძლიათ გადახვიდეთ თუ არსებობს ასეთი საოცრება და არ გაქვთ ნანახი. უბრალოდ, ემოციების მეტად შესაგრძნობად საიმონის  სახეს გაჩვენებთ. თუ ამ შოუს ერთგული მაყურებელი ხართ, გეცოდინებათ, რომ იშვიათი სანახავია საიმონი ამ სახით!

მესამე სეზონის ფინალი 2009 წლის 30 მაისს შედგა. სამ ფინალისტად ხალხმა საქსოფონისტი julian smith, susan boyle  და მოცეკვავეების ჯგუფი “Diversity” აირჩია. გაიმარჯვა diversity-მ. მეორე ადგილზე susan-ი გავიდა და მესამეზე სმიტი.  მეორე ადგილის მიუხედავად სუზენმა  სენსაცია მოახდინა-

ინტერნეტ გადატრიალება!

შეხედეთ მისი ვიდეოს view-ების რიცხვს!  ან შეფასებებს თუნდაც. თან ეს ვინ იცის როგორი ვიდეოა, ათასობით მომხმარებელს  აქვს ატვირთული  youtube-ზე და შეიძლება ამაზე მეტი ნახვები სხვას აქვს.

სკრინშოტი youtube-დან

მოკლედ, ამ პროექტის ყველაზე კარგ ანალოგად ინგლისური მიმაჩნია. ყველაფერი გამართულია და იდეალური!

რაც შეეხება ქართულ ვერსიას.  როგორც მე ვიცი, ჟიურის წევრები იქნებიან:

• გეგა ფალავანდიშვილი
• მაია ასათიანი
• ნიკა მემანიშვილი

არც ჩაწერაზე ვყოფილვარ, პრინციპში ბევრი ინფორმაციაც არ მაქვს, მაგრამ რატომღაც მგონია, რომ ჟიური ამ შემადგენლობით ვერ იქნება მთლად ეფექტური. როლები გასაგებია ვინ მკაცრი იქნება და ვინ ლმობიერი, მაგრამ რაღაც ისე არ არის. თუმცა დიდი იმედი მაქვს და მართლა მინდა, რომ ცუდი არ გამოვიდეს.

გეგა

მაია

ნიკა

გეგა კარგია! ერთმნიშვნელოვნად კარგია,- მთლად საიმონი თუ არა, მგონია, რომ საინტერესო იქნება.

მაია ასათიანს რაც შეეხება, მართლა ვერ წარმომიდგენია.. სიმართლე გითხრათ, მაინცდამაინც კმაყოფილი არ ვარ მისი ჟიურიში ჩასმით და არ ვიცი ამისგან რა გამოვა.

ნიკას გამოცდილი ჟიურია. მომწონდა ჯეოსტარში, არასდროს იყო მიკერძოებული და პროფესიულ რჩევებს უფრო გასცემდა, ვიდრე “ყველა მიყვარხართ ვერ გამოგარჩევთ” ფრაზებს. თანაც ალბათ მუსიკალურ მხარეს ჩვენთანაც უფრო მეტი ყურადღება დაეთმობა მონაწილეების მხრიდან. ყველგან ასეა- ცეკვა და სიმღერა უფრო ხშირია, ვიდრე მაგალითად იუმორისტული ნომრები, ტრიუკები და ა.შ.

წამყვანები იქნებიან თიკა ფაცაცია და ვანიკო თარხნიშვილი. ორივე მათგანს გამოცდილება აქვს ამ სფეროში და დარწმუნებული ვარ კარგად გაართმევენ თავს.

ვანიკო და თიკა.ნიჭიერის ჩაწერაზე. სურათი მოხსნილ არს ფორუმ.ჯიდან:D

ესეც ფორუმიდან, "ნიჭიერის" ჩაწერა

ვიღაცა იტყვის მორიგი ფულის მახეაო, ვიღაცა იტყვის ქართველებს არაფერი არ გამოგვდისო (წინასწარ თან), ვიღაცა იტყვის ყველაფერი გადმოკოპირებული რატომ გვიყვარს ქართველებსო, ვიღაცას მოეწონება.. მაგრამ რაც მთავარია, ვიღაცა წარმატებას მიაღწევს.

რა თქმა უნდა, იქნება აუცილებლად მომენტები, რომლებიც “დნნ დშნ”-ს და მრავალი მათგანის მსგავსად დიდი ხნის მანძილზე იქნება ერთობლივი გართობის საგანი (რომელიც აუცილებლად მარაზმში გადავა), მაგრამ იქნება გამარჯვებული და სხვა თუ არაფერი: კანადა, დიდი ბრიტანეთი, ავსტრალია, საფრანგეთი, პორტუგალია, რუსეთი, საბერძნეთი, სერბეთი, შვედეთი, ბელგია, ჩინეთი, ავსტრია, გერმანია.. – იმ ქვეყნების ჩამონათვალს, სადაც ამ ტელეშოუს ანალოგები არსებობს,  საქართველოც მიემატება.

მოკლედ, ოპტიმისტურად ველოდები ნიჭიერს და თუ კონკურსში გამარჯვებულის რანგით არა, როგორც ბლოგერი, ჩემს ბლოგზე აუცილებლად დავწერ ეთერში გასვლისთანავე პირველ შთაბეჭდილებებს.

27 Responses to “BRITAIN’S GOT TALENT”